Sarfraz Arish
har shaḳhs bad-havas ḳhabar ke sabab se tha
kashti men intishar bhanvar ke sabab se tha
ankhen badan baghair aur ankhon men ek ḳhvab
mahrumi-e-ma.al safar ke sabab se tha
bina.i ke ghubar se manzar men dhuul thi
vo aa.ina sarab nazar ke sabab se tha
itna qalil bosa ki ehsas-e-lams bhi
ḳhud-saḳhta nashe ke asar ke sabab se tha
varna saḌak ki meḌ Thaharti qusur-var
sad imtinan hadisa Dar ke sabab se tha
khiḌki se raushni ki vazahat pe ye khula
divar ka javaz to ghar ke sabab se tha
miTTi ke martabe ka khula e’tiraf tha
mera zamin ko bosa shajar ke sabab se tha
Leave a Reply