nigah-e-yar yunhi aur chand paimane
ab apne hosh men aane na paa.en divane
mohabbat asl men kya chiiz hai ḳhuda jaane
dahan men jitni zabanen hain utne afsane
jo ashk-e-surḳh hai nama-nigar hai dil ka
sukut-e-shab men likhe ja rahe hain afsane
jahan-e-hosh men ta-hashr tabsire honge
zaban men apni ye kya kah rahe the divane
shugun us nigah-e-mai-farosh se le kar
ham aap vaz.a karenge hazar maiḳhane
na puchho ah-e-mohabbat ki raḳhna-andazi
ḳhuda gavah hai apne hue hain begane
har ashk-e-surḳh hai daman-e-shab men aag ka phuul
baghair sham.a ke bhi jal rahe hain parvane
qadam qadam pe sada-e-shikast-e-tauba hai
nisar-e-laghzish-e-saqi hazar paimane
fareb-e-husn-e-sama.at tiri duha.i hai
haqiqaton ki jagah chhinte hain afsane
buland-o-past nazar farq-e-zahiri hai ‘siraj’
bane to hain inhin abadiyon se virane
Leave a Reply