Rehana Qamar
us ka chehra bhi sunata hai kahani us ki
chahti huun ki sunun us se zabani us ki
vo sitamgar hai to ab us se shikayat kaisi
aur sitam karna bhi aadat hai purani us ki
besh-qimat hai ye moti se miri palkon par
chand aansu hain mire paas nishani us ki
us jafa-kar ko maalum nahin vo kya hai
be-muravvat ko hai tasvir dikhani us ki
ek vo hai nazar-andaz kare hai mujh ko
ek main huun ki dil o jaan se divani us ki
tum ko ulfat hai ‘qamar’ us se to ab kah dena
samne sab ke suna dena kahani us ki
Leave a Reply