Shahid Kamal
kunj-e-dil men hai jo malal uchhal
raushni ke kanval uchhal uchhal
Dhaal tu apne mahr-o-mah-o-nujum
din uchhal apne mah-o-sal uchhal
be-sipar hai ye meri tanha.i
ai miri jaan apni Dhaal uchhal
apni asudgi-e-jan ke liye
mere hisse men kuchh vabal uchhal
ho koi sher sher-e-shor-angez
fikr koi koi ḳhayal uchhal
jo tujhe ḳhud se munfarid kar de
kuchh to aisi na.i misal uchhal
aa.ega phir koi javab us ka
to faza men koi saval uchhal
ḳhauf aane laga ‘kamal’ se ab
mere hisse men kuchh zaval uchhal
Leave a Reply