phulon se saj ga.i kahin sabza pahan liya
barish hui to dharti ne kya kya pahan liya
jab se paḌhi chata.i-nashinon ki zindagi
moTa mahin jo bhi mila kha pahan liya
ik jism hai jo roz badalta hai kuchh libas
ik ruuh hai ki is ne jo pahna pahan liya
aisa laga ki ḳhud bhi baḌa ho gaya huun main
jab bhi baḌon ka main ne utara pahan liya
ḳhud mil gaya hai zehn ko manzil ka har suragh
qadmon ne jab safar ka irada pahan liya
main ne bhi aankh pher li us ki taraf se aaj
us ne bhi aaj dusra chehra pahan liya
be-iḳhtiyar ho ga.e jab bhi hamare ashk
ghabra ke ham ne ankhon pe chashma pahan liya
Leave a Reply