lahu men tairte phirte malal se kuchh hain
kabhi suno to dilon men saval se kuchh hain
main ḳhud bhi Duub raha huun har ik sitare men
ki ye charagh mire hasb-e-hal se kuchh hain
gham-e-firaq se ik pal nazar nahin haTti
is aa.ine men tire ḳhadd-o-ḳhal se kuchh hain
ik aur mauj ki ai sail-e-ishtibah abhi
hamari kisht-e-yaqin men ḳhayal se kuchh hain
tire firaq ki sadiyan tire visal ke pal
shumar-e-umr men ye maah o saal se kuchh hain
Leave a Reply