Poet
soz-e-dil se pur-nam ho ga.i
ab to ye atish bhi shabnam ho ga.i
jab tabi.at ḳhugar-e-gham ho ga.i
rafta rafta har ḳhalish kam ho ga.i
zaḳhm dil ke ho chuke the la-ilaj
ik nigah-e-lutf marham ho ga.i
hai mohabbat ka ye me.araj-e-kamal
zindagi ḳhud tishna-e-gham ho ga.i
kar chuke hain un se ham ahd-o-vafa
aur ye zanjir mohkam ho ga.i
gham pe tha saara madar-e-zindagi
gham hua kam to ḳhushi kam ho ga.i
vo sitam kar ke pasheman jab hue
sharm se gardan miri ḳham ho ga.i
dekhna mere tasavvur ka kamal
arzu-e-dil mujassam ho ga.i
der tak milte rahe qalb-o-nazar
guftugu kuchh aaj baham ho ga.i
chheḌ dena ho gaya ‘shankar’ sitam
zulf un ki aur barham ho ga.i
Leave a Reply