ham yahan rahte hain apni hi nigahbani men
jab se mushkil nazar aane lagi asani men
mere hathon men ye kashkol thamaya kis ne
kaisa saman mila be-sar-o-samani men
haa.e kya log the jo josh-o-junun rakhte the
ab koi lutf nahin chak-garebani men
kabhi is shahr men kuchh der Thahar kar dekho
zindagani ko ravan maut ki tabani men
ham ne ik umr basar ki hai yahan bhi lekin
kuchh izafa na hua dasht ki virani men
aks mera mujhe lagta hai jahan-tab hua
sar-e-kohsar dikha.i jo diya paani men
mere atraf hain kitne hi parinde ḳhamosh
hai koi kamil-e-fan kar-e-sulaimani men
Leave a Reply