apna pata na apni ḳhabar chhoḌ ja.unga
be-samtiyon ki gard-e-safar chhoḌ ja.unga
tujh se agar bichhaḌ bhi gaya main to yaad rakh
chehre pe tere apni nazar chhoḌ ja.unga
gham duriyon ka duur na ho pa.ega kabhi
vo apni qurbaton ka asar chhoḌ ja.unga
guzregi raat raat mire hi ḳhayal men
tere liye main sirf sahar chhoḌ ja.unga
jaise ki sham.a-dan men bujh jaa.e koi sham.a
bas yuun hi apne jism ka ghar chhoḌ ja.unga
main tujh ko jiit kar bhi kahan jiit pa.unga
lekin mohabbaton ka hunar chhoḌ ja.unga
aansu milenge mere na phir tere qahqahe
suuni har ek rahguzar chhoḌ ja.unga
sansar men akela tujhe agle janm tak
hai chhoḌna muhal magar chhoḌ ja.unga
us paar ja sakengi to yaden hi ja.engi
jo kuchh idhar mila hai udhar chhoḌ ja.unga
gham hoga sab ko aur juda hoga sab ka gham
kya jaane kitne dida-e-tar chhoḌ ja.unga
bas tum hi pa sakoge kuredoge tum agar
main apni raakh men bhi sharar chhoḌ ja.unga
kuchh der ko nigah Thahar ja.egi zarur
afsane men ik aisa khanDar chhoḌ ja.unga
koi ḳhayal tak bhi na chhu pa.ega mujhe
ye charon samt aThon pahar chhoḌ ja.unga
Leave a Reply