Ateeq Anzar
mire dil men ḳhushbu basi thi jo vo makan apna badal ga.i
kisi aur abr ki chhanv men baḌi duur mujh se nikal ga.i
vo jo barf abhi thi jami hui kisi maslahat ke hisar men
zara vaqt ki jo hava lagi to vo ek pal men pighal ga.i
mire ghar ki unchi munDer pe vo jo kaali billi thi ghumti
vahi aa ke chupke se raat men miri faḳhta ko nigal ga.i
baḌi tangiyon men pali hui vo ghazal dukhon men baḌi hui
tujhe lutf-e-aish na de saki to vo teri raah men jal ga.i
use dekhne ki thi aarzu mujhe us ki thi baḌi justuju
magar us ke ariz-e-naz pe miri har nigah phisal ga.i
Leave a Reply