Ejaz Rahmani
ab karb ke tufan se guzarna hi paḌega
suraj ko samundar men utarna hi paḌega
fitrat ke taqaze kabhi badle nahin jaate
ḳhushbu hai agar vo to bikharna hi paḌega
paḌti hai to paḌ jaa.e shikan us ki jabin par
sachcha.i ka iz.har to karna hi paḌega
har shaḳhs ko a.enge nazar rang sahar ke
ḳhurshid ki kirnon ko bikharna hi paḌega
main soch raha huun ye sar-e-shahr-e-nigaran
ye us ki gali hai to Thaharna hi paḌega
ab shana-e-tadbir hai hathon men hamare
halat ki zulfon ko sanvarna hi paḌega
ik umr se be-nur hai ye mahfil-e-hasti
‘ejaz’ koi rang to bharna hi paḌega
Leave a Reply