Wajid Ali Shah Akhtar
nayab hai sukun dil-e-be-qarar men
bismil ki hai tadap mire kunj-e-mazar men
gulzar-e-dahr men chaman-e-be-khizan huun main
laale ka rang hai jigar-e-dagh-dar men
kanta mila hai guunj ka zulfon ka jaal hai
baali ki machhli haath lagi hai shikar men
nau laakh ki jabhi hui qimat use nasib
moti the mere ablon ke un ke haar men
ayyam-e-aish men rukh-e-daulat se hai alag
afsos par hamare kate hain bahar men
jab se udi hai khak-e-alam rashk-e-mahtab
ik asman aur hai mere ghubar men
dhoi hui hai duudh se teri zaban-e-saf
‘akhtar’ tu hi hai shairon ke e’tibar men
Leave a Reply