Shahryar
main kore kaghaz par likhun phir ek kaali nazm
alakh jagate sannaton se phir se sajaun bazm
gaddar amrudon ki khushbu pagal kar jaae
meri in khali aankhon ko jal-thal kar jaae
duur darindon ki avazen khud se ladti hon
mere us ke biich men lambi raten padti hon
shiknon se aari ik bistar mujh ko takta ho
jism mira jab aadha sota aadha jagta ho
tab main karun ye azm
ki likhun koi kaali nazm
Leave a Reply