Altaf Mashhadi
ḳhush-rang-o-sahr-kar nazaron ko kya hua
allah is chaman ki baharon ko kya hua
raushan thiin jin se bazm-e-tasavvur ki ḳhalvaten
in rashk-e-mehr-o-mah sitaron ko kya hua
sahil ko pa saki na kabhi kashti-e-hayat
dariya-e-arzu ke kinaron ko kya hua
apne para.e ho ga.e qismat ke saath saath
majbur zindagi ke saharon ko kya hua
naghma ba-lab huun aur na naala ba-lab huun main
saz-e-junun-o-ishq ke taron ko kya hua
lab-ha-e-lala-gun hain aur ik talḳhi-e-itab
miThe tabassumon ki phuvaron ko kya hua
muddat se gulistan hai ba-rang-e-ruḳh-e-mariz
‘altaf’ surḳh surḳh baharon ko kya hua
Leave a Reply