kyuun kisi aur ko dukh dard suna.un apne
apni ankhon se bhi main zaḳhm chhupa.un apne
main to qaa.em huun tire gham ki badaulat varna
yuun bikhar ja.un ki ḳhud haath na aa.uun apne
sher logon ke bahut yaad hain auron ke liye
tu mile to main tujhe sher suna.un apne
tere raste ka jo kanTa bhi mayassar aa.e
main use shauq se collar par saja.un apne
sochta huun ki bujha duun men ye kamre ka diya
apne saa.e ko bhi kyuun saath jaga.un apne
us ki talvar ne vo chaal chali hai ab ke
paanv kaTte hain agar haath bacha.un apne
aḳhiri baat mujhe yaad hai us ki ‘anvar’
jaane vaale ko gale se na laga.un apne
Leave a Reply