jab bhi a.ankhon men tire vasl ka lamha chamka
chashm-e-be-ab ki dahliz pe dariya chamka
fasl-e-gul aa.i khule baagh men ḳhushbu ke alam
dil ke sahil pe tire naam ka taara chamka
aks be-naqsh hue aa.ine dhundlane lage
dard ka chand sar-e-bam-e-tamanna chamka
rang azad hue gul ki girah khulte hi
ek lamhe men ajab baagh ka chehra chamka
pairahan men bhi tira husn na tha hashr se kam
jab khule band-e-qaba aur hi naqsha chamka
dil ki divar pe uḌte rahe malbus ke rang
der tak un men tiri yaad ka saaya chamka
ruuh ki aankh chaka-chaund hui jaati hai
kis ki aahaT ka mire kaan men naghma chamka
lahren uTh uTh ke magar us ka badan chumti thiin
vo jo paani men gaya ḳhuub hi dariya chamka
hijr panpa na tira vasl hamen raas aaya
kisi maidan men taara na hamara chamka
jaise barish se dhule sehn-e-gulistan ‘ajmad’
aankh jab ḳhushk hui aur vo chehra chamka
Leave a Reply