Syed Amin Ashraf
ru-e-ḳhandan rag-e-jan dida-e-giryan jaise
qafas-e-rang hai ye alam-e-imkan jaise
nashsha-e-sher uḌaa.e liye jaata hai mujhe
jaise rahvar-e-saba taḳht-e-sulaiman jaise
aarzu hi se hai hangama-e-alam saara
aarzu hi se hai dil tiflak-e-nadan jaise
aanch bhi aati hai ḳhush-pairahni se aksar
kahin roidagi-e-sho.ala ho pinhan jaise
sham-e-tanha.i kalid-e-dar-e-nazzara hai
jaise mizhgan-e-siyah abru-e-janan jaise
harf-e-sada varaq-e-nam suḳhan-e-ḳhud-rafta
dil hai ya mir-taqi-‘mir’ ka divan jaise
be-rava be-sar-o-pa ek alam-nak sada
zindagi qafila-e-sham-e-ghariban jaise
buḌhe bargad ke tale soch men gum mard-e-faqir
aane vaala hai kahin se koi tufan jaise
Leave a Reply