Ghulam Husain Sajid
kaḌi nigah rakhega vo sim-tan mujh par
ki mehrban hai kisi phuul ka badan mujh par
main ek khoi hui aag ki talash men tha
shaguft hone lage hain magar chaman mujh par
phir ek baar vahi dhuup oḌh kar niklun
karega chhanv agar aaj bhi gagan mujh par
firaq-o-vasl haqiqat men ek hon ki na hon
kisi ke ishq men lazim hai husn-e-zan mujh par
alag alag hi rahenge dam-e-visal bhi ham
main apne man pe fida huun na mera man mujh par
kisi tilism se raushan hai mera dil ‘sajid’
dayar-e-ghaib se utrega koi fan mujh par
Leave a Reply