Saleem Faraz
use ḳhud ko badal lena gavara bhi nahin hota
hamara aisi duniya men guzara bhi nahin hota
hamen is moḌ par le aate hain ye ḳhuun ke rishte
ki jiine ke alava aur chara bhi nahin hota
ye saare chand suraj un ke qadmon men hi rahte hain
hamare haath men kyuun ek taara bhi nahin hota
Dubo detin hamen dariya-e-mah-o-sal ki maujen
is ik lamhe ka jo hasil sahara bhi nahin hota
ta.ajjub hai ki ham akasr vahin par Duub jaate hain
jahan se duur ankhon men kinara bhi nahin hota
sabhi ko shahar apna dilkash-o-dilchasp lagta hai
agarche vo samarqand-o-buḳhara bhi nahin hota
ye kin na-ashna logon ki basti men chale aa.e
suḳhan kaisa kahin se ik ishara bhi nahin hota
muḳhalif mausam-e-dil hi nahin hota masafat men
muafiq kuchh ‘salim’ apna sitara bhi nahin hota
Leave a Reply