yuun bhi hone ka pata dete hain
apni zanjir hila dete hain
pahle har baat pe ham sochte the
ab faqat haath uTha dete hain
qafila aaj kahan Thahrega
kya ḳhabar abla-pa dete hain
ba.az-auqat hava ke jhonke
lau charaghon ki baḌha dete hain
dil men jab baat nahin rah sakti
kisi patthar ko suna dete hain
ek divar uThane ke liye
ek divar gira dete hain
sochte hain sar-e-sahil ‘baqi’
ye samundar hamen kya dete hain
Leave a Reply