dete hain dua dard ke maare use kahna
palkon se zara bojh utare use kahna
ab koi bhi rut bhati nahin dida-e-dil ko
lagte hain sabhi zahr nazare use kahna
hoti hi nahin ham se mohabbat ki tijarat
is daur men hain sirf ḳhasare use kahna
mumkin hai mire lauT ke aane ka tasavvur
ik baar mujhe dil se pukare use kahna
main rang sajavaT ke sabhi bhuul chuki huun
ab aa ke mira ruup nikhare use kahna
insan bhi ab sanpon ki fitrat men Dhale hain
har shaḳhs ajab ruup hai dhare use kahna
bikhre hue apne hi ḳhad-o-ḳhal men gum huun
a.ine men phir aks sanvare use kahna
kahna ki miri maang men suraj to nahin hai
pahlu men saja de sabhi taare use kahna
Leave a Reply