abdul-ahad-saaz

Marne Ki Pukhta-Khayali Mein Jine Ki Khami Rahne Do

marne ki pukhta-khayali men jiine ki khami rahne do

ye istidlali tark karo bas istifhami rahne do

ye tez-ravi ye tursh-rui chalne ki nahin hai duur talak

shabnam-nazari shirin-sukhani asuda-gami rahne do

sau dasht samundar chhano par aate raho qarya-e-dil tak bhi

bairuni hava ke jhonkon men ik mauj-e-maqami rahne do

ab tanz pe kyuun majbur karo ham ghair mulavvis logon ko

fan pesh karo ye fahrist-e-asma-e-girami rahne do

raftar par itni daad na do manzil na miri chhino mujh se

az-rah-e-hunar mire hisse ki thodi nakami rahne do

jatlate phiro gar qad apna paimaish ki mohlat to na do

is qamat-e-bala ke sadqe ye zud-qayami rahne do

ab ham se pareshan-halan ko kya amn-o-sukun raas aaega

yunhi bohrani chalne do saara hangami rahne do

ai ‘saz’ vagarna log tumhen thahraenge sanpon ka maskan

is shahr-e-aks-gazida men aina-fami rahne do

More Poems

Leave a Comment