jab ki nazar talash fareb-e-nazar mila
dad-e-hunar ke naam pe zaḳhm-e-hunar mila
ḳhud apne sar pe apni saliben uTha chalo
avargan-e-shahr ko kar-e-digar mila
in.aam qad ki nash-o-numa se mukar gaya
dastar to mili hai magar kis ko sar mila
tum mil sake na tark-e-ta.alluq ke ba.ad phir
yadon ka ik hujum mujhe umr bhar mila
mere dil-e-tabah ne sau sau jatan kiye
jo nusḳha-vafa bhi mila be-asar mila
tum jis qadar ghurur se nashsha-ba-sar mile
haan itne hi ḳhulus se main sar-ba-sar mila
Leave a Reply