maza kya jo yunhi sahar ho ga.i
nahin bhi pahar-do-pahar ho ga.i
tire gham men shab yuun basar ho ga.i
gharaz rote rote sahar ho ga.i
na a.ina har vaqt dekha karo
kahoge kisi ki nazar ho ga.i
jo bandhi kamar qatl-e-ushshaq par
kamar to na thi par kamar ho ga.i
sabab un ki ranjish ka kahna nahin
koi puchhe kis baat par ho ga.i
labon par thaharne se ai jaan! husul
idhar aa ga.i ya udhar ho ga.i
koi baat ulfat ki ab to nahin
jo kuchh ho ga.i peshtar ho ga.i
tira vaada go jhuut hi kyuun na ho
tasalli hamari magar ho ga.i
taghaful hai har baat par kis liye
mire dil ki tujh ko ḳhabar ho ga.i
qayamat ke asar bhi ho gae
shab-e-gham daraz is qadar ho ga.i
manana rulana hi baham raha
shab-e-vasl yunhi sahar ho ga.i
nahin kya karoge na ham ko sunao
shikayat adu ki magar ho ga.i
ḳhuda hai jo is but se phir ho milap
gharaz aaj to is qadar ho ga.i
kaha bhi to us ne kuchh aisa nahin
zara baat men chashm tar ho ga.i
na maana na maana usi shoḳh ne
ki duniya udhar ki idhar ho ga.i
tumhen zid na milne ki hai kis liye
miri aah kya be-asar ho ga.i
vo vaade se kyuun phir gae kah tu kuchh
ye kya baat ai nama-bar ho ga.i
ye qismat hua vasl bhi gar nasib
to ranjish bhi har baat par ho ga.i
vo aae bhi yaan us se ai dil husul
koi dam ko taskin agar ho ga.i
tire gham men ye haal to ho gaya
ḳhushi ab tiri fitnagar ho ga.i
ye jhuti mohabbat se un ki husul
shikayat adu ki agar ho ga.i
unhen sulh manzur hai mujh se kab
kahun kya hui kyunki par ho ga.i
nizam us ghadi ka kahun haal kya
jab us ne kaha vo sahar ho ga.i