mere afkar ne jis shai se jila paa.i hai
ishq ki zinda-dili husn ki ra.ana.i hai
shaḳh-e-gul men jo nazakat jo lahak aa.i hai
teri bahon ki lachak hai teri angḌa.i hai
phir ubharne lage na ḳhasta-mazi ke nuqush
lauh-e-dil par koi tasvir ubhar aa.i hai
gham-o-andoh ke is daur men kya aish-o-nishat
shadyane hain ḳhushi ke na vo shahna.i hai
zindagi hai ki bulati hai taqazon ki taraf
dil giraftar-e-ḳham-e-zulf-e-chalipa.i hai
rahiye ḳhamosh to halat bigaḌ jaate hain
aur kuchh kahiye to andesha-e-rusva.i hai
dil vo kya hai ki na ho jis men mohabbat ka junun
sar vo kya hai ki jo be-vaz.a jabin-sa.i hai
main ki darpesh hai mujh ko safar-e-dur-o-daraz
aur ik vo hain ki un ko gham-e-tanha.i hai
koi marham na mudava koi phaha na dava
ziist oḌhe hue zaḳhmon ki rida aa.i hai
zarf-o-himmat se siva di nahin jaati taklif
itna gham dete hain jitni ki shakeba.i hai
‘taj’ ye zor-e-bayan jo bhi suḳhan men kuchh hai
asar-e-tarbiyat-e-shevan-e-mina.i hai
Leave a Reply