Hafeez Merathi
be-saharon ka intizam karo
ya.ani ik aur qatl-e-am karo
ḳhair-ḳhvahon ka mashvara ye hai
Thokaren khaao aur salam karo
dab ke rahna hamen nahin manzur
zalimo! jaao apna kaam karo
ḳhvahishen jaane kis taraf le jaa.en
ḳhvahishon ko na be-lagam karo
mezbanon men ho jahan an-ban
aisi basti men mat qayam karo
ye hunar bhi baḌa zaruri hai
kitna jhuk kar kise salam karo
saanp aapas men kah rahe hain ‘hafiz’
astinon ka intizam karo
Leave a Reply