justuju ka nidar qafila
mishalen thaam kar, raat ko chirta
hansta gaata huaa, apni manzil ki janib ravana hua
sab ke chehron par raushan huiin kavishen
khoji ankhon men jhilmil sitare jale
kitni raushan faza kitni raushan faza!!
aao apne qadam tez kar len ki vo samne apni mehnat ka pauda tanavar shajar ban gaya
par ye raushan faza men dhundalka sa kyuun chha gaya
(mishalon ko jalae rakho sathiyo, giit gaate raho, aage badhte raho)
ek chamkila gosha dikhai nahin de raha, kin andheron ki faujon ka hamla hua
(mishalon ko jalae rakho)
manzilen to qarib aa gaiin
phir ye qadmon men bedi si kyaa!
phir ye ankhon pe badal se kyuun
mishalon ki qataren rukin (aur chalte hue saae bhi tham gae)
giit sab tauq-e-gardan hue
qafila daera ban gaya jhuk gaya ro diya
ek manzar sada ke liye giili ankhon men zinda hua
ek baazu gira
ek mishal bujhi
ek raushan javan justuju so gai
ek chamkila gosha andhera hua
Leave a Reply