Poet
jo ada hai be-aman hai aj-kal
mere dil ka imtihan hai aj-kal
multafit barq-e-tapan hai aj-kal
shaḳh-e-gul par ashiyan hai aj-kal
ik junun-e-justuju men be-jihat
jada-paiman karvan hai aj-kal
har qadam uThta hai manzil ki taraf
ishq mir-e-karvan hai aj-kal
koi barq-e-sho.ala-zan hi ai falak
zindagi ḳhvab-e-giran hai aj-kal
kaun sunta hai kisi ki dastan
apni apni dastan hai aj-kal
ishrat-e-fasl-e-baharan al-aman
bijliyon men ashiyan hai aj-kal
hazrat-e-‘talib’ hain kuchh kho.e hue
koi shayad mehrban hai aj-kal
Leave a Reply