Wali Alam Shaheen
jab os buund buund giri sa.eban se
ḳhushbu si ik uḌi mire kachche makan se
tu sahilon pe jis ka nishan DhunDhta phira
rishta to us ne joḌ liya badban se
na-qadri-e-hunar ki mujhe taab hi na thi
main ne ḳhud apni jins uTha li dukan se
thi us ki hi lahu ki sada jo palaT ga.i
us ne to jhank kar bhi na dekha makan se
bikhri hui thiin charon taraf na-rasa.iyan
vo paTne chala tha ḳhala ko uḌaan se
kya kya huiin qubul dua.en us ek shab
phir ek phuul bhi na gira asman se
garmi men Tin ki chhat ne jalaya kuchh aur bhi
jaaḌe men barf sar pe giri sa.eban se
rezon men baT gaya huun main ‘shahin’ har taraf
pahchan le mujhe mire bikhre nishan se
Leave a Reply