Noor Jahan Sarwat
phir koi apni vafa ka vasta dene laga
duur se avaz mujh ko hadsa dene laga
tai karo apna safar tanhaiyon ki chhanv men
bhiid men koi tumhen kyuun rasta dene laga
rahzan hi raah ke patthar utha kar le gae
ab to manzil ka pata khud qafila dene laga
ghurbaton ki aanch men jalne se kuchh hasil na tha
kaise kaise lutf dekho fasla dene laga
shahr-e-na-pursan men ai ‘sarvat’ sabhi qaazi bane
yaani har na-faham apna faisla dene laga
Leave a Reply