jab adhure chand ki parchha.in paani par paḌi
raushni ik na-mukammal si kahani par paḌi
dhuup ne kachche phalon men dard ka ras bhar diya
ishq ki uftad na-puḳhta javani par paḌi
gard ḳhamoshi ki sab mere dahan se dhul ga.i
is qadar barish suḳhan ki be-zabani par paḌi
us ne apne qasr se kab jhank kar dekha hamen
kab nazar us ki hamari be-makani par paḌi
asl sone par tha jitna bhi mulamma.a jal gaya
dhuup us shiddat ki alfaz-o-ma.ani par paḌi
tark kiije ab dilon men narm goshon ki talash
be-hisi ki ḳhaak harf-e-mehrbani par paḌi
zaḳhm-e-dil us ki tavazo.a men namakdan ban gaya
ye musibat bhi hamari mezbani par paḌi
apne hathon TuTne ka tajraba to ho gaya
choT be-shak saḳht thi jo ḳhush-gumani par paḌi
Leave a Reply