Kaukab Zaki
vo sang-dil mira rahbar hai kya kiya jaa.e
aur us ke haath men ḳhanjar hai kya kiya jaa.e
mire buzurgon ke sar par huma ka saaya tha
ye aaj ghairon ke sar par hai kya kiya jaa.e
ye holi us ne jo kheli hai atish-o-ḳhun ki
safir-e-amn bhi shashdar hai kya kiya jaa.e
uḌengi dhajjiyan phir amn ki ki vo zalim
khaḌa hua sar-e-mimbar hai kya kiya jaa.e
ye taḳht-o-taj ye mahlon ka kal jo vaali tha
vatan men apne hi be-ghar hai kya kiya jaa.e
batao kaise jala.un main sham.a ulfat ki
ki tez bughz ki sarsar hai kya kiya jaa.e
‘zaki’ vo apni safa.i men ḳhvah kuchh bhi kahe
guman mera barabar hai kya kiya jaa.e
vo jis ne ḳhuun se sincha tha is chaman ko ‘zaki’
ḳhilaf us ke hi mahzar hai kya kiya jaa.e
Leave a Reply