ghar men miTTi ka diya maujud hai
raushni se rabta maujud hai
chahiye bina.i sunne ke liye
ba.az rangon men sada maujud hai
kab se uḌta hai ghubara arz ka
is men ab kitni hava maujud hai
go bahut mahdud hai jins-e-vafa
phir bhi mere bevafa! maujud hai
umr bhar jangal men rah sakta huun main
is men ghar jaisi faza maujud hai
zikr-e-gumrahi kahan se aa gaya
rasta hi kaun sa maujud hai
na-ḳhuda be-ḳhauf ab langar uTha
naav men ik ba-ḳhuda maujud hai
Leave a Reply