Duniya Ka Na Uqba Ka Koi Gham Nahin Sahte

Siraj Lakhnavi

duniya ka na uqba ka koi gham nahin sahte

jo aap ke ho jaate hain apne nahin rahte

ro le abhi kuchh aur ghanimat hai ye rona

ban jaate hain vo zahr jo aansu nahin bahte

ab koi na.i chaal chal ai gardish-e-duniya

ham roz ke fitne ko qayamat nahin kahte

sab puchho guzarti hai jo ham par vo na puchho

dil rota hai aur aankh se aansu nahin bahte

aag aur dhuan aur havas aur hai ishq aur

har hausla-e-dil ko mohabbat nahin kahte

is daur men karvaT na badal jazba-e-ehsas

hain chain se jo hosh men apne nahin rahte

hairan hain ab jaa.en kahan DhunDne tum ko

a.ina-e-idrak men bhi tum nahin rahte

didar ke talib to ‘siraj’ ab bhi hain lekin

jalna to baḌa kaam hai aanch ik nahin sahte