hai iḳhtiyar men tere na mere bas men hai
vo ek lamha jo auron ki dastaras men hai
vo munh se kuchh nahin kahta ki pesh-o-pas men hai
badan ka karb to zahir nafas nafas men hai
agarche shor bahut kucha-e-havas men hai
vo kya kare ki jo chalisven baras men hai
karega kaun use sazish-e-badan men sharik
jo shaḳhs qaid abhi ruuh ke qafas men hai
uTho ki phir hamen izn-e-safar mile na mile
abhi to lutf-e-sada nala-e-jaras men hai
use pasand ki vo TuuT kar gira varna
shajar men kya nahin hota jo ḳhar-o-ḳhas men hai
Leave a Reply