Akhtar Nazmi
jo bhi mil jaata hai ghar-bar ko de deta huun
ya kisi aur talabgar ko de deta huun
dhuup ko deta huun tan apna jhulasne ke liye
aur saaya kisi divar ko de deta huun
jo dua apne liye mangni hoti hai mujhe
vo dua bhi kisi gham-ḳhvar ko de deta huun
mutma.in ab bhi agar koi nahin hai na sahi
haq to main pahle hi haqdar ko de deta huun
jab bhi likhta huun main afsana yahi hota hai
apna sab kuchh kisi kirdar ko de deta huun
ḳhud ko kar deta huun kaghaz ke havale aksar
apna chehra kabhi aḳhbar ko deta huun
meri dukan ki chizen nahin bikti ‘nazmi’
itni tafsil ḳharidar ko de deta huun
Leave a Reply