dagh-e-dil ham ko yaad aane lage
log apne diye jalane lage
kuchh na pa kar bhi mutma.in hain ham
ishq men haath kya ḳhazane lage
yahi rasta hai ab yahi manzil
ab yahin dil kisi bahane lage
ḳhud-farebi si ḳhud-farebi hai
paas ke Dhol bhi suhane lage
ab to hota hai har qadam pe guman
ham ye kaisa qadam uThane lage
is badalte hue zamane men
tere qisse bhi kuchh purane lage
ruḳh badalne laga fasane ka
log mahfil se uTh ke jaane lage
ek pal men vahan se ham uTThe
baiThne men jahan zamane lage
apni qismat se hai mafar kis ko
tiir par uḌ ke bhi nishane lage
ham tak aa.e na aa.e mausam-e-gul
kuchh parinde to chahchahane lage
shaam ka vaqt ho gaya ‘baqi’
bastiyon se sharar aane lage
Leave a Reply