Nahin Ye Aks Hua Hai Samajhta Kyun Nahin Main

Shafaq Sopori

nahin ye aks hua hai samajhta kyuun nahin main

mire qarib khaḌa hai samajhta kyuun nahin main

ye chiiz aur nahin koi mera saaya hai

magar ye mujh se juda hai samajhta kyuun nahin main

ye koi pahlu mira hai jo zaat se meri

ka.i dinon se juda hai samajhta kyuun nahin main

jahan pe jism ki divar men shigaf paḌa

vahin se sabza uga hai samajhta kyuun nahin main

tumhari aankh se main apne ḳhvab dekhta huun

yahi to meri saza hai samajhta kyuun nahin main

phisalti ret pe fihrist-e-ḳhvab likhni hai

ye imtihan kaḌa hai samajhta kyuun nahin main

dhuan huun puchhta huun vo gaya hai sho.ale par

ki sho.ala us pe gaya hai samajhta kyuun nahin main

tum apne-ap se kyuun iḳhtilaf karte ho

‘shafaq’ mo.amla kya hai samajhta kyuun nahin main