Hashim Azimabadi
yuun to hai sahl har ik kaam ka asan hona
maulvi ke liye dushvar hai insan hona
niim uryan jo nazar aati huun chalte phirte
koi dushvar hai un ke liye uryan hona
baiThne ki jo ijazat mujhe DevḌhi pe mili
bole ahbab mubarak tujhe darban hona
maslahat ka tha taqaza jo baḌha li daḌhi
aqd ki shart thi din-dar musalman hona
bhuul kar bhi na kabhi shaiḳh ko mehman karna
bhuul kar bhi na kabhi shaiḳh ke mehman hona
ishtiha-ḳhez hai iftari ki ḳhushbu ‘hashim’
roza-daron na mujhe dekh ke hairan hona
Leave a Reply