Imdad Imam Asar
jafa.en hoti hain ghuTta hai dam aisa bhi hota hai
magar ham par jo hai tera sitam aisa bhi hota hai
adu ke aate hi raunaq sidhari teri mahfil ki
ma.az-allah insan ka qadam aisa bhi hota hai
rukavaT hai ḳhalish hai chheḌ hai iiza pe iiza hai
sitam ahl-e-vafa par dam-ba-dam aisa bhi hota hai
hasinon ki jafa.en bhi talavvun se nahin ḳhali
sitam ke ba.ad karte hain karam aisa bhi hota hai
dil-e-mahjur aḳhir intiha hai har nahusat ki
kabhi sa.aden hote hain baham aisa bhi hota hai
na kar shikva hamari be-sabab ki bad-gumani ka
mohabbat men tire sar ki qasam aisa bhi hota hai
na ho dard-e-juda.i se jo vaqif us ko kya kahiye
hamen vo dekh kar kahte hain gham aisa bhi hota hai
buton ke milne-julne par na jaana ai dil-e-nadan
baḌha kar rabt kar dete hain kam aisa bhi hota hai
hamen bazm-e-adu men vo bulate hain tamanna se
karam aisa bhi hota hai sitam aisa bhi hota hai
jagah di mujh ko ka.abe men ḳhuda-e-pak ne zahid
tu kahta tha ki maqbul-e-haram aisa bhi hota hai
hua karta hai sab kuchh ai ‘asar’ us ki ḳhuda.i men
karen da.ava ḳhuda.i ka sanam aisa bhi hota hai
Leave a Reply