saare chehre tanbe ke hain lekin sab par qal.i hai
mohmal taba-e-mohmal kya hai donon ka ik ma.ani hai
mante hain aap is ke qad men us ka qad shamil hi na tha
aage ham kyuun bahsen sahab itni baat hi kaafi hai
dhaan ke kheton ka sab sona kis ne churaya kaun kahe
be-mausam be-fasl abhi tak is iz.har ki dharti hai
andeshe andaze ban kar mere safar ke ḳhvab bane
har basti men aa kar socha shayad aage basti hai
us ki sada se gunge lamhe paa.el jaise bajte hain
bachchon jaisa ḳhush hota huun jab bhi barish hoti hai
be-mashshata husn ki gaanv gaanv tha vo kahan gaya
bed ke saya-zaron ne kab pahchan apni khoi hai
malik saat samundaron ki vus.at ka huun main lekin
mera dil kyuun bhar aata hai jab koi naddi sukhti hai
apne aap se main sharminda hota jo mujrim hota
mere baare men ye duniya kahne do jo kahti hai
manzur apne dast-e-tahi ko dekh ke tujh se puchhe kyuun
harf-e-suḳhan ik tere siva hai kaun si shai jo sasti hai
Leave a Reply