bhaTakta karvan hai aur main huun
talash-e-ra.egan hai aur main huun
bata.un kya tumhen hasil safar ka
adhuri dastan hai aur main huun
naya kuchh bhi nahin qisse men mere
vahi bojhal saman hai aur main huun
har ik janib tilismati manazir
nazar ka imtihan hai aur main huun
koi shahid nahin sajdon ka mere
jabin par ik nishan hai aur main huun
shikasta bal-o-par takte hain mujh ko
fasil-e-asman hai aur main huun
dua mangun kahan kis dar pe ja ke
dayar-e-be-aman hai aur main huun
bahut dhundli nazar aati hai duniya
umidon ka dhuan hai aur main huun
bhaTakta huun zamin par sar-barahna
falak ka sa.eban hai aur main huun
Leave a Reply