Shyam Gokul Na Jaana Ki Radha Ka Ji Ab Na Bansi Ki Tanon Pe Lahraega

Sufi

shyam gokul na jaana ki radha ka ji ab na bansi ki tanon pe lahraega

kis ko fursat gham-e-zindagi se yahan kaun be-vaqt ke raag sun paega

us gali se chali dard ki rau magar shahr men ahl-e-dil hain na ahl-e-nazar

jaane kis sar se guzregi ye mauj-e-khun jaane kis ghar ye sailab-e-gham jaega

zulmat-e-gham se itne hirasan na ho kaun mushkil hai yaaro jo asan na ho

ye garan-khvab lamhe bhi kat jaenge raat dhal jaegi din nikal aaega

har nafas har qadam har nae mod par vaqt ik zakhm-e-nau de raha hai magar

vaqt khud apne zakhmon ka marham bhi hai vaqt ke saath har zakhm bhar jaega

kis lagan kis tamanna se kis chaav se mausam-e-rang-o-nik.hat ko di thi sada

kya khabar thi ki abr-e-bahar-afrin aag ke phuul gulshan pe barsaega

tere gham ke charaghon ki sad-rang zau ik kiran de sakegi na ehsas ko

bazm-e-jan itni sunsan ho jaegi shahr-e-dil itna viran ho jaega