Aqeel Nomani
kahan ki ah-o-zariyan malal tak nahin hua
dil-e-ḳharab pa.emal yak-ba-yak nahin hua
bikhar ga.e the TuuT kar magar ham is ke ba.ad hi
kuchh is tarah sanbhal ga.e kisi ko shak nahin hua
baḌi hi karbnak thi vo pahli raat hijr ki
dobara dil men aisa dard aaj tak nahin hua
sitamgaron se dosti chali tamam zindagi
sitam-zadon pe mehrban magar falak nahin hua
‘aqil’ marg-e-arzu koi ḳhabar na ban saki
ye hadisa hua magar lab-e-saḌak nahin hua
Leave a Reply