tufan-e-abr-o-bad se har-su nami bhi hai
peḌon ke TuTne ka saman didani bhi hai
arzan hai apne shahr men paani ki tarah ḳhuun
varna vafa ka ḳhuun baḌa qimti bhi hai
yaaro shaguft-e-gul ki sada par chale chalo
dasht-e-junun ke moḌ pe kuchh raushni bhi hai
TuuTe hue makan hain magar chand se makin
is shahr-e-arzu men ik aisi gali bhi hai
begana-var guzri chali ja rahi hai ziist
muḌ muḌ ke doston ki tarah dekhti bhi hai
‘aḳhtar’ guzarte lamhon ki aahaT pe yuun na chaunk
is matami julus men ik zindagi bhi hai
Leave a Reply