Sulaiman Areeb
koi dushman koi hamdam bhi nahin saath apne
tu nahin hai to do-alam bhi nahin saath apne
saath kuchh duur tire ham bhi ga.e the lekin
ab kahan jaa.en ki ḳhud ham bhi nahin saath apne
vo bhi ik vaqt tak ḳhurshid-ba-kaf phirte the
ye bhi ik vaqt hai shabnam bhi nahin saath apne
naḳhun-e-vaqt ne kab zaḳhm ko dahkaya hai
aise ik vaqt ki marham bhi nahin saath apne
samne kitni saliben hain pa.e be-gunahi
aaj laḳht-e-dil-e-maryam bhi nahin saath apne
pi ke socha ki ḳharidenge gham-e-duniya bhi
tai hue daam to dirham bhi nahin saath apne
Leave a Reply