Sahir Ludhianvi

Bhadka Rahe Hain Aag Lab-E-Naghmagar Se Hum

bhadka rahe hain aag lab-e-naghmagar se ham

khamosh kya rahenge zamane ke Dar se ham

kuchh aur badh gae jo andhere to kya hua

mayus to nahin hain tulu-e-sahar se ham

le de ke apne paas faqat ik nazar to hai

kyuun dekhen zindagi ko kisi ki nazar se ham

maana ki is zamin ko na gulzar kar sake

kuchh khaar kam to kar gae guzre jidhar se ham

Leave a Comment