husn ne maan liya qabil-e-tazir mujhe
nazar aa.i hai mohabbat ki ye taqsir mujhe
kyuun na ho bada-e-sar-josh ki tauqir mujhe
mil ga.i pir-e-ḳharabat se tahrir mujhe
jalva-e-husn ke mafhum pe jab ghaur kiya
ek dhundli si nazar aa.i hai tasvir mujhe
ab miri vahshat-e-rusva ka ajab aalam hai
kar diya aap ne vabasta-e-zanjir mujhe
be-takalluf ruḳh-e-zeba se uTha.e vo naqab
husn ḳhud pa.ega ek paikar-e-tasvir mujhe
zindagi ik na.e aalam men nazar aati hai
le chali aaj kahan gardish-e-taqdir mujhe
khich ga.i dil-kashi-e-husn mari nazron men
ji bahalne ko mili aap ki tasvir mujhe
zulf-e-shab-gun ruḳh-e-anvar ki sata.ish ko siva
koi mazmun na mila qabil-e-tahrir mujhe
husn-e-dilkash ke talavvun pe nazar jab pahunchi
na raha phir gila-e-gardish-e-taqdir mujhe
Leave a Reply