sang-e-tiflan ka hadaf jism hamara nikla
ham to jis shahr ga.e shahr tumhara nikla
kis se ummid karen koi ilaj-e-dil ki
charagar bhi to bahut dard ka maara nikla
jaane muddat pe tiri yaad kidhar se aa.i
raakh ke Dher men poshida sharara nikla
dil pe kya jaane guzar jaati hai kya pichhle-pahar
os Tapki to kahin sub.h ka taara nikla
jaate jaate diya is tarah dilasa us ne
biich dariya men koi jaise kinara nikla
koi sahra ka havala na samundar ki misal
jo bhi Duuba hai jahan dost hamara nikla
bul-havas zid men sahi dar-o-rasan se guzra
ab pasheman hai ki sauda ye ḳhasara nikla
Leave a Reply