Pain Har Ek Rah-Guzar Par Udasiyan

Ameer Qazalbash

pa.in har ek rah-guzar par udasiyan

nikli hui hain kab se safar par udasiyan

ḳhvabida shahr jagne vaala hai lauT aao

baiThi hui hain shaam se ghar par udasiyan

main ḳhauf se larazta raha paḌh nahin saka

phaili hui thiin ek ḳhabar par udasiyan

suraj ke haath sabz qabaon tak aa ga.e

ab hain yahan har ek shajar par udasiyan

apne bhi ḳhatt-o-ḳhal nigahon men ab nahin

is tarah chha ga.i hain nazar par udasiyan

phaila raha hai kaun kabhi sochta huun main

ḳhvabon ke ek ek nagar par udasiyan

sab log ban ga.e hain agar ajnabi to kya

chhoḌ a.engi mujhe mire dar par udasiyan